اکادمی ایکٹ کے سیکشن 12کی رو سے اکادمی ادبیات پاکستان کی ذمے داریاں اور اغراض و مقاصد درج ذیل ہیں:

• پاکستانی زبانوں اور ادب کے فروغ اور ملک میں اہل قلم برادری کی فلاح و بہبود کے لیے تمام حکومتی نظام ہائے کار کی نگرانی۔
• پاکستانی زبانوں اور ادب کے فروغ اور اہل قلم کی فلاح و بہبود سے متعلقہ منصوبہ سازی پر وفاقی حکومت کو مشاورت فراہم کر نا۔
• زبان و ادب کے شعبے میں تحقیقاتی منصوبوں کے لیے ترجیحات کا تعین کرنا اور ان منصوبوں پر کام شروع کرنا۔
• ادبی اداروں اور محکموں کی کارکردگی کا جائزہ لینا ، ان کے نئے منصوبوں کی چھان پھٹک کرنا اور انھیں سرکاری گرانٹ فراہم کرنا۔
• ملک میں قومی یکجہتی اور فکری مفاہمت کے فروغ کے لیے پاکستانی زبانوں سے منتخب ادب پاروں کا بین ا للسانی ترجمہ کرانے کے لیے ایک بیت الترجمہ قائم کرنا۔
• قومی اور علاقائی زبانوں میںمعیاری حوالہ جاتی کتابوں جیسے لغات،دوائرِ معارف، قاموسوں وغیرہ کی تیاری کے عمل کی نگرانی کرنا۔
• لسانیاتی تجربہ گاہ، لسانیاتی کتب خانہ اور مرکز دستاویزات قائم کرنا تاکہ نظریۂ پاکستان سے ہم آہنگ قومی اور علاقائی زبانوں پرہونے والے کام میں سہولت ہو۔
• نظریہ پاکستان سے ہم آہنگ قومی اور علاقائی زبانوں میں تخلیقی تحریروں کے فروغ کے لیے موزوں اقدامات کرنا۔
• پاکستانی ادب سے غیر ملکی قارئین کومتعارف کرنے کے لیے موزوں اقدامات کرنا۔
• اردو، انگریزی اور دیگر پاکستانی زبانوں میں ادبی رسالے شائع کرنا۔
• زبان و ادب سے متعلقہ تمام امور کے لیے مشیروں کی ایک مستند مجلس مہیا کرنا۔
• مختلف ادبی انعامات اور اعزازات کے لیے اہلِ قلم کو نامزد کرنا۔
• زبان و ادب سے متعلق بین الاقوامی اجتماعات میں وفاقی حکومت کی نمائندگی کرنا یا ان امور سے متعلق سفارشات پیش کرنا۔
• پاکستانی زبانوں اور ادب کے لیے ممتاز اہل قلم کی خدمات کا قومی سطح پر اعتراف کر نا اور قومی اہمیت کی تحقیقی تحریروں کی اشاعت کا بندوبست کر نا۔
• حاجت مند اہل قلم کی مالی امداد کرنا اور اہل قلم کے مفادات کی نگہداشت کرنا۔
• ادبی ذخیرے کی طباعت و اشاعت کا بندو بست کرنا۔
• ملک میں طباعت و اشاعت کی صنعت کی ترویج کے لیے اقدامات تجویز کرنا۔
• مختلف آسامیاں پیدا کرنا اور سرکاری قواعد و ضوابط کے مطابق ان پر موزوں افراد تعینات کرنا۔
• اکادمی کی مالیات، حسابی کھاتا جات اور سرمایہ کاری کی نگرانی کرنا اور اس سے متعلق قواعد و ضوابط وضع کر نا۔
• استعداد کار میں اضافے اور معلومات کے تبادلے کے لیے دوسرے ملکوں میں ہم منصب اداروں سے رابطہ کاری ۔
• اکادمی کی افرادی قوت کی اہلیتوں میں بہتری کے لیے کام کرنا۔
• اپنے اثاثہ جات کا بہترین استعمال کرنا۔
• زبان و ادب سے متعلق غیر ملکی تکنیکی معاونت والے منصوبوں کے نفاذ میں متعلقہ وزارت کے ذریعے تعاون فراہم کرنا۔
• پاکستانی زبانوں اور ادب کی ترویج اور ملک میں اہل قلم کی فلاح و بہبود سے متعلق مجلس یا وفاقی حکومت کی طرف سے تفویض کردہ کوئی بھی کام یا سرگرمی سرانجام دینا۔